साहित्य सृजन जारी हे
छत्तीसगढ़ राज्य बने के बाद छत्तीसगढ़ी साहित्य तेजी से रचे जात. साहित्यकार मन के मन म बड़ उमंग हे फेर ओला बने ढंग ले संजोवइया प्रयास के जरूवत हे. शासन के स्तर म दृढ़ इच्छा शक्ति के अभाव दिखत हे. हालंकि जनप्रतिनिधि मन छत्तीसगढ़ी भासा ल संविधान के आठवीं अनुसूची म शामिल करे के मांग समय-समय म करत आवत हें. केंद्र सरकार डाहर पूरा छत्तीसगढ़ बड़ उम्मीद लगाय देखत हे.
अरपा पैरी के धार ….. ल राज्य गीत के मान्यता
छत्तीसगढ़ के मुख्यमंत्री भूपेश बघेल जी छत्तीसगढ़ी भासा अउ संस्कृति के प्रचार-प्रसार बर तहेदिल से नवीन सोच रखथें. निश्चय ही ये दिशा म उनकर प्रयास रेखांकित होही अइसे सहज जन-विश्वास हे. अत्यंत लोकप्रिय ‘छत्तीसगढ़ वन्दना गीत’ ‘अरपा पैरी के धार ….. ‘ ल राज्य गीत घोषित कर अपन छत्तीसगढ़ी परेम ल प्रकट करे हे. मुख्यमंत्रीजी जनता के बीच म जाके ठेठ छत्तीसगढ़ी म बोल के मिठास घोरथे. छत्तीसगढ़ी म गोठ-बात करे ले जनता आत्मीयता के अनुभव करथे. सरकारी कार्यक्रम मन के नाव छत्तीसगढ़ी न म होय ले ओखर बड़ सकारात्मक प्रभाव परथे. एहा बहुत जरूरी हे के छत्तीसगढ़ी भासा के प्रत्येक क्षेत्र म व्यवहारिक प्रयोग हो. छत्तीसगढ़ी शब्दकोश अउ राजकीय छत्तीसगढ़ी शब्दकोश घलो सहज सुलभ हो.
छत्तीसगढ़ विधानसभा अध्यक्ष डॉ. महंत के चिट्ठी
छत्तीसगढ़ी ल राज-काज के भासा बनाय के सेती अखिल भारतीय प्रशासनिक शब्दावली के प्रकाशन ह मील के पथरा बरोबर हे. फेर बुता अटकगे हे. छ.ग. विधानसभा अध्यक्ष ह मुख्यमंत्री भूपेश बघेल ल छत्तीसगढ़ी ल संविधान के आठवीं अनुसूची म शामिल कराय खातिर कोशिश करे बर, छत्तीसगढ़ी राजभाषा आयोग के अध्यक्ष नियुक्त करे बर चिठ्ठी लिखे हे. छत्तीसगढ़ के जनता ह घलो चाहथे के राजभाषा छत्तीसगढ़ी के विकास तेज गति से हो.
सांसद संतोष पांडे के माँग: दूरदर्शन के छत्तीसगढ़ी चैनल शुरू हो
लोकसभा म छत्तीसगढ़ के संसदीय क्षेत्र राजनंदगांव के सांसद संतोष पांडे ह लोकसभा म छत्तीसगढ़ी लोक संस्कृति के सम्मान के मुद्दा ल उठइस. सांसद पांडे ह किहिस-दूरदर्शन म छत्तीसगढ़ क्षेत्र के समाचार ल छत्तीसगढ़ी भासा म प्रसारित करे जाय. जेखर से छत्तीसगढ़ राज्य के लोककला, संस्कृति, अउ जनजीवन के विशेषता पूरा भारत म प्रसारित हो सके. दूरदर्शन के छत्तीसगढ़ी चैनल शुरू करे जाय. सांसदजी ह ‘अरपा पैरी के धार महानदी हे अपार …’. छतीसगढ़ के सुप्रसिद्ध राज्य गीत के माध्यम से अपन बात रखते हुए सदन ल अवगत करइस जइसे भगवान राम के संबंध अयोध्या से है व्इसने ओखर महतारी कौशल्या के संबंध छ्त्त्तीसगढ़ राज्य से है. पांडे जी बतइस के पूरा भारत म केवल छतीसगढ़ राज्य हर अइसे हे जेला महतारी के उपाधि दे गे हे. सदन में उपस्थित प्रसारण मंत्री प्रकाश जावडेकर ह भरोसा दिस के जोंन संभव हे ओ करे जही.
सांसद फूलो देवी नेताम के मांग : दूरदर्शन के छत्तीसगढ़ी चैनल हो
छत्तीसगढ़ खनिज संसाधन से सम्पन्न राज्य हे. छत्तीसगढ़ी अउ हिंदी इहाँ सम्पर्क भासा हे. इहाँ के जनप्रतिनिधि मन छत्तीसगढ़ी के विकास बर प्रयत्नशील सोच के हें फेर ओ सोच जमीन म दिखना चाही. राज्य सभा म छत्तीसगढ़ के सांसद फूलो देवी नेताम ह दूरदर्शन के पृथक चैनल से छत्तीसगढ़ी भासा म कार्यकम प्रसारण के पुरजोर मांग करे हे. नेताम किहिस छत्तीसगढ़ ल राज्य बने बीस बरस होगे फेर छत्तीसगढ़ी भासा के विकास बर ठोस कदम नइ उठाय गे हे. दूरदर्शन म विभिन्न राज्य के स्थानीय भासा के अलग-अलग चैनल हे. छत्तीसगढ़ म दूरदर्शन के पृथक छत्तीसगढ़ी चैनल नइ हे. निजी क्षेत्र के छत्तीसगढ़ी भासा के चैनल छत्तीसगढ़ी म कार्यकम प्रसारित करत हें. छत्तीसगढ़ी भासा, छत्तीसगढ़ी कला अउ छत्तीसगढ़ी संस्कृति के विकास बर दूरदर्शन ल छत्तीसगढ़ी चैनल शुरू करना अत्यंत आवश्यक हे.
छत्तीसगढ़ी आठवीं अनुसूची म शामिल हो
ये भी पढ़ें: छत्तीसगढ़ी विशेष: हिस्सा बांटा बर लाखा डरगे, होगे नियाव
केंद्र सरकार जब छत्तीसगढ़ी ल संविधान के आठवीं अनुसूची म शामिल करही तब छत्तीसगढ़ी ल राष्ट्रीय स्तर म पहिचान अउ सम्मान मिलही. साहित्यकार मन के कृति ल राष्ट्रीय स्तर के पुरस्कार मिले ले छत्तीसगढ़ी के मान बाढ़ही. जनप्रतिनिधि छत्तीसगढ़ी म शपथ ले सकत हें. राष्ट्रीय स्तर म छत्तीसगढ़ी के शोध कार्य ल बढ़ावा मिल सकत हे. संघ लोक सेवा आयोग के परीक्षा म छत्तीसगढ़ी ल एक विषय के रूप म मान्यता मिलही. छत्तीसगढ़ राज्य के दु करोड़ जनता छत्तीसगढ़ी बोलथें. राज्य म छत्तीसगढ़ी अउ हिंदी संपर्क भासा हे. छत्तीसगढ़ी के विकास म तपस्वी साहित्यकार सहित सबे वर्ग के योगदान हे. अखबार, पत्रिका आकाशवाणी, दूरदर्शन अउ संचार क्रान्ति के बाद विभिन्न छत्तीसगढ़ी न्यूज चैनल ,कम्प्यूटर अउ अन्य संसाधन एमा शामिल हे.
